Z Dešna/Dissen. Slědny zapust su wuswěśili slědny kóńc tyźenja w měrcu, to groni, až buźo cas za retrospektiwu. Młoźinski koordinator Tobias Unger jo togodla pśed Domowinskim młoźinskim aktiwom śěgnuł bilancu zapustoweje sezony. Někotare zapusty jo se wón sam woglědał. Wósebnje gołbinska młoźina jo jogo pozitiwnje pógnuła. „Gołbinska młoźina jo pśed zapustom dwa rejowańskej wjacora za zwucowanje a zaspiwanje pśewjadła, aby kuždy mógał toś tu njeźelu pšawu polku rejowaś. Pśi zapusće jo było wiźeś, wót prědka do kóńca jo kuždy sobu spiwał.“

Młoźina z Wjerbna jo se k tomu žortnje tak wugroniła: „Stakim smy to teke pór razow z rejowanim wopytali, ale někak jo to pśecej skóńcyło z piwom. Ale take kniglicki spiwow za zwucowanje by dobre byli. Dajo take něco?“ Wšake su jim naraźili spiwaŕske knigły, kótarež su Smogorjowarje zestajili.