Z Rogeńca/Branitz. Załožba parka a groda Rogeńc wjercha Pücklera rozpšawijo, až su slědny tyźen 21 klimje pśiměrjonych bomow ze slěźeńskego projekta Humboldtoweje uniwersity w Barlinju do Rogeńskego parka pśesajźili. Pśi tom jadna se wó we Łužycy mało znate družyny klona, graba a duba.

Christoph Haase, projektowy wjednik Rogeńskeje bomoweje uniwersity to tak wopisujo: „Wjaselimy se na tu jadnoraznu góźbu, nowe klimowe družyny do našych wopytowych plantažow pśiwześ. Mjazy nimi jo na pśikład dwójobarwny dub z Pódpołnocneje Ameriki abo japański grab. Te wjele zlubjece a robustne drjewiny su swójo nowe městno w pśez suchotu zeškóźonem parkowem wobceŕku blisko Noweje rogeńskeje bomoweje uniwersity namakali.“ Bomy su hyšći w lěśe 2010 za slěźeński projekt w Barlinju-Dahlemje sajźili. Zaměr jo był, jich gódnosć ako klimaresilientne měsćańske bomy pśespytowaś. Pó zakóńcenju slěźeńskego projekta słuže bomy něnto nadalej wědomnosći a směju w Rogeńskem parku pokazaś, kak derje se wóni za pśiměrjenje historiskich zagrodow na klimowu změnu góźe.