Z Kamjeneje/Steinkirchen. Skóncnje jo był sobotu, dnja 18. měrca, pśězowy bal. Pśeliš dłujko njejsu mógali jen swěśiś. Tak su byli jano wjasołe a se smjejuce woblica wiźeś, ako su se luźe pśed něgajšnym kamjeńskim gosćeńcom gromaźili. Stare kóšule su wordowali wobźiwane a cypjele zrownane. Dujaŕska kapała z trompetarjoma Thomas Fischer a Siggi Hunkelowa jo teke južo zagrała a jo pśibytnych pózbuźiła k prědnej Annemarie-polce. Nalěwarja zapusta su měli swóje kružki sobu a su žeńske a młode źowća zastarali z paleńcom. Dypkownje zeger dweju wótpołdnja su se wobźělnice forměrowali a wótejšli. Wognjowa wobora jo jich z módrym swětłom pśewóźowała. Na „Aleksanderowem naměstnje“ jo było na casu za drugu Annemarie-polku. Dalej jo šło pó wejsnej droze až k wótbocnej droze do směra gósćeńca „Burglehn“ (to jo na kradu starem słowjańskem groźe). Dalšne wobźělnice su wjasołe a dobreje mysli k tomu pśišli. Wjelike parkowanišćo a tam cakajuce pśiglědarje su se toś pominali tśeśu Annemarie-Polku.