Z Chóśebuza/Cottbus. Jo wuměna mjazy konfesijami a nabóžninami móžna? Wótegrono na to pšašanje su pytali 20. měrca wobźělniki Serbskego blida w Serbskem muzeumje w Měsće. Ako rozgranjańska partnaŕka jo była pśepšosona faraŕka Jadwiga Malinkowa ze Slěpego. Wóna jo wulicowała wó nazgónjenjach ako ewangelska Serbowka w Górnej Łužycy, wó dožywjenjach z ortodoksnymi kśesćijanami w pólskich stronach blisko ukrainskeje granice a wó wšakich kśesćijańskich konfesijach a religijach w Libanonje, źož jo wóna studěrowała. Teke druge pśibytne su powědali wó swójich dožywjenjach, we zwisku ze wšakimi konfesijami a religijami w Nimskej a drugich krajach. Na pśikład wó mjenjej a wěcej wuspěšnem zawězanju ukrainskich ortodoksnych wugnańcow do ewangelskego wósadnego žywjenja we Łužycy, wó felujucem kontakśe mjazy pśisłušnikami wšakich religijow w Israelu a Palestinje, wó pśiwześu serbskich ewangelskich studentow do pólskeje katolskeje wósady w Lipsku abo raźonej ekomeniskej namšy w Žylowje.