Z Chóśebuza/Cottbus. W internaśe Dolnoserbskego gymnaziuma su 24. měrca serbske filmy tema byli, a to šesć góźinow dłujko. Šula za Dolnoserbsku rěc a kulturu jo informěrowała wót historiskego a aktualnego filmowanja we Łužycy. Stwóriśele filmow, dokumentaristy, docenty, slěźarje, chronisty a študańce su gromadu pśišli, aby wiźeli, słyšali a diskutěrowali stare a nowe filmowe sekwence.

Južo někak hundert lět jo to serbske prezentne we filmach, cesto dosć ma to něco z klišejom cyniś: ze zapustom, pśězu, jatšownymi jajami abo kokotom, jo dr. Annett Brězanec groniła, wóna nawjedujo Serbski kulturny archiw w Budyšynje. We swójich slěźenjach jo se wopokazało, až zagronite serbske stwóriśele filmow njejsu wiźeli swójo městno we prědnem rěźe. Až Serby su mjeńšyna, jo se wótbłyšćował w myslenju a statkowanju, až su swóju identitu ako mjenjej gódne wiźeli. Teke filmy wót domowniskich swěźenjow we Wětošowje zachopk 1930ych lět su zwětšego stajili folkloru z burskimi drastwami, spiwami a nałogami do srjejźi.