Z Chóśebuza/Cottbus. Pśecej zasej serbska rěc! Gaž se Domowina abo serbske institucije zmakaju a wobraduju, jo to grono pśecej zasej wó njej. Wó tom, kak z dolnoserbskeju rěcu tuchylu wuglědajo, co jo ze serbskim šulstwom a serbskimi ceptaŕkami a ceptarjami a co jo docełego notne za to, až naša mamina rěc dalej wóstanjo, se rewitalizěrujo. Casy pak diskusije wjele konkretnego a wužytnego njepśinjasu, teke togodla, až se pšaweje rady njewěmy. Ale młogi raz su wóni konstruktiwne, wužytne a pozitiwne. Take wobradowanje smy mógali dožywiś slědny tyźeń srjodu w Dolnoserbskem gymnaziumje w Měsće. Wuběrk za serbske nastupnosći – krotko „Serbski wuběrk“ – pśi wokrejsnem sejmje wokrejsa Sprjewja-Nysa (SPN), ga běšo tamkor swójich cłonkow a dalšnych serbskich a nimskich gósći pśepšosył na swójo 12. pósejźenje.