Z Hochoze/Drachhausen. Slědnu sobotu jo Šula za dolnoserbsku rěc a kulturu do Hochozy pśepšosyła do gósćeńca „K złotemu plonoju“ na serbske wótpołdnjo. Wjele luźi jo to póbitowanje šule pśiwzeło a tak jo se něźi 130 gósći a grajarjow na tom wótpołdnju tam zmakało. Šołta Hochoze Ronny Henke a šulska wjednica Uta Henšelowa stej wótwóriłej zarědowanje. Połny program jo cakał na gósći z cełego wokrejsa Sprjewja-Nysa, z wokrejsa Damna-Błota a Górne Błota-Łužyca. Tak su źiśi ze źiśownje „Tyca“ nawuknuli na pśikład nalětne spiwy w serbskej a nimskej rěcy a krotke reje. Dalšnu pódpěru za program jo dało wót boka pólskego trio „Domdideraj“, nan Marius Massier jo grał na piano, jadna źowka na cello a druga źowka jo spiwała. Ale teke žeńskecy chor „Konopiania“ ze Žarow jo se póstarał wó luštne šunklowanje pśi połnje wobsajźonych blidach. Mjazy programowymi dypkami su se mógali wšykne z kafejom a tykańcom zmócniś. Ten abo tamny pak teke njejo gronił běłemu „ně“.