Z Janšojc/Jänschwalde. W serbsko-nimskem domowniskem muzeju su hyšći twóŕby gubinskego wuměłca Klaus Bramburger wiźeś. Wjele luźi znajo hyšći jogo wjelike wólejowe mólby, ako su wisali w žurli kjarcmy „K5“ (wu Krawcojc) w Janšojcach: nykus, wužowy kral, pśezpołdnica a dalšne.
W spódnej etažy muzeja jo teke wiźeś wobstawnje wustajone wuměłske źěło Klausa Bramburgera: „Ptaškowa swajźba“. To jo jadno z tych slědnych intaktnych woknow z barwojtego głažka.
Ako wuwucony šlodaŕ a fachowy źěłaśeŕ za chemiske nitki (Chemiefaserfacharbeiter) jo wóstał swójomu wuměłskemu rozpalenju, tomu mólowanju, pśecej zwěrny. Teliko interesantnych twóŕbow jo tak pśez wjele lět nastało a ako ludowy wuměłc w NDR jo wón namakał swóje motiwy teke w serbskich tradicijach a powěsćach. Pśez to su teke něnto wustajone motiwy nastali ako źěło pó skazanju wokrejsnego kabineta za kulturne źěło w lěśe 1988. Až do srjejźi apryla jo wustajeńca hyšći wiźeś. Dnja 22. apryla musy wóna pón byś wurumowana za nowe rozpokazowanje „Tracht+Landschaft“ („Drastwa+Krajina“).