Elisabeth Wolfowa jo zbuźiła tšojenje wó awstralskem drogowarju Ludwigu Leichhardtu (1813– 1850). Bźez jeje statkowanja by wordowali žywjeńska droga a wuspěchy młodego Serba ze Zabroda pla Žrjobolc/Trebatsch zabydnjone. Pśed 150 lětami, dnja 15. měrca 1873, jo se Elisabeth Wolfowa naroźiła w Chóśebuzu.

Z Bobolc/Boblitz. Až do źinsa móžo se domowniski slěźaŕ Horst Schmädicke ze Žrjobolc/Trebatsch na tu epizodu dopomnjeś, až jo měła tegdy 82-lětna mólaŕka a enkelźowka Elizabeth Wolfowa pśi wuswěśenju wopomnjeńskego kamjenja Ludwigoju Leichhardtoju dnja 7. julija 1955 wjelike śěžkosći, flašu sekta z granitowego zanjasonego kamjenja rozbiś.

„Wše pśibytne su tegdy z wjelikim wjaselim pomagali, aby se šampańske pśez kamjeń rozlało“, wulicujo ten źinsa 80-lětny rentnaŕ, kótaryž jo tegdy 12 lět stary był. Wót togo casa jo stojał wopomnjeński kamjeń pśed wejsańskeju šulu a jo dopominał wuknikow a wuknice, až mógu wótpowědne napinanje w šuli a pitśku gluki wjeliki kšac w swětowych stawiznach wordowaś.