Z Gołbina/Gulben. Znate źiśecy spiw: „Es schneit, es schneit, kommt alle aus dem Haus!“ jo był pśecej zasej k słyšanjeju na slědnem februarskem kóńcu tyźenja. Pśewóźowane wót mrozowatych temperaturow a běłych pjeluchow jo sobotu, 25. februara, jadnab 50 camprowarjow a camprowaŕkow z pyšnučkimi kostimami zymu wugóniło. Z dobreju myslu a mócnymi głosami su śěgnuli wót doma k domoju, su zezběrali jaja, tuk a pjenjeze. Zawěsće su za kužde pósćenje cesnu rundu rejowali a małki paleńc wupili. Pilne žeńske su jaja w domje wejsańskego zgromaźeństwa pśigótowali, tak až su mógali wšykne camprowarje a camprowaŕki se sednuś k gótowemu blidoju. Z napołnjonymi brjuchami jo se skóńcył napinajucy źeń camprowanja.
Njeźelu jo z wjelikim rušom dalej šło. Zasej su pilne pomagajuce slědne pśigótowanja w domje wejsańskego zgromaźeństwa gótowali. K zapustojskemu pśeśěgoju su se pón 12 dorosćonych a 15 młoźinskich pórikow zgromaźili. Gromaźe z kapału su nejpjerwjej do gumna doma wejsańskego zgromaźeństwa šli, źož su to obligatoriske foto cynili.