Až kśě lětosa załožyś w Dolnej Łužycy kradu nowy projekt, z kótarymž dej se dolnoserbska rěc mócnje spěchowaś a rozšyriś, to wót slědnego tyźenja znate jo w cełej Nimskej. W telewizijnem sćelaku ARD ga su wałtoru, 28. februara, we wjacornem programje „Tagesthemen“ pśedstajili projekt „Zorja“. Pśi tom jo moderator Ingo Zamperoni wustajił, až njejsu za Serbow jano wažne nałogi a drastwa, ale głownje mamina serbska rěc, a ta jo bóžko bejnje wobgrozona.

Reportarje wót ARD su dojěli do Dešna. Tam njejsu jano wótmólowali rědne motiwy w tej jsy, ale su pśedstajili w tych wušej tśich minutach tśoch młodych luźi, ako su iniciatory a pódpěrowarje projekta „Zorja“, ako změjo teke swóju domownju w Dešnje. Su to Maximilian Hasacki ako wjednik togo projekta, Šarlota Kušcyc a Gregor Kliem. Maximilan Hasacki jo mjazy drugim rozjasnił, dla cogo co ako wustuděrowany chemikaŕ něnto za to źěłaś, až se dolnoserbska rěc wumóžyjo. Teke šołta Fred Kaiser jo krotko k wěsći dał, až gmejna projekt „Zorja“ pódpěrujo.