Z Noweje Jsy/Neuendorf. Tak ako wšykne jsy w Dolnej Łužycy, źož kužde lěto taki pšawy serbski zapust swěśe, graju teke w Nowej Jsy w Picańskem amśe zapustojske jubileje wjeliku a wósebnu rolu, pla młodych rowno tak ako w staršych generacijach. 1997 běchu tam wugótowali 100. zapust z 123 pórami. A dokulaž jo měła na tom ceła wjas swójo wjelike wjasele, su wót togo casa pón swěśili teke kuždy dalšny tšochu mjeńšy jubileum: 2002 ten 105., 2008 ten 111., 2012 ten 115. a 2017 ten 120. z 68 pórami a 24 źiśimi. A pópšawem by był 2022 ten 125. na rěźe. Korony dla jo to bóžko wupadnuło, a togodla su to pśestarcyli na lětosa. A to wósebne w Nowej Jsy jo to, až tam z lěta 2010 kužde lěto młoźina a ženjone gromaźe zapustuju a teke campruju. Pó lěśe 1948, źož jo se wótměł w tej jsy w něntejšnych Gatojcach zasej prědny zapust pó wójnje, ga su tam hyšći wugótowali pśecej młoźinski a muskecy zapust.