Bryland (Friedland). Jadnab 60 luźi z Brylanda, Bezkowa, Chóśebuza a bliskich łužyskich stronow jo pśišło 19. februara do Brylandojskego grodu słyšat wó zgromadnem žywjenju Serbow, Nimcow a Žydow w srjejźowěkowem Brylanźe. To jo teke śěžyšćo 14. zwězka „Pśinoskow k sorabistice“ w nakłaźe Pódstupimskeje uniwersity „Das Modell Friedland – Vom Zusammenleben deutscher, jüdischer und wendischer Bewohner in einer Niederlausitzer Kleinstadt“.

Informaciski centrum Jany Nowki w tak pomjenjonem brylandojskem „StreleBurg“ jo pódprěł zwopšawdnjenje togo tšojenja. Pó pśiwitanju šołty Maika Koschaka jo zestajaŕka Pódstupimskich pśinoskow k sorabistice dr. Madlena Norbergowa wobkšuśiła, až slědy serbskeje rěcy su hyšći w mjenjach póznaś a až toś te knigły su 14. zwězk k serbskim temam, kótarež wudajo Nakładnistwo Pódstupimskeje uniwersity. Wóna jo pśidała, až su to drugi zwězk awtorowego tandema dr. Alfreda Roggana a Tobiasa Preßlera, kótarejž stej z 12. pśinoskom k sorabistice „Sorbische/Wendische Spuren in der nördlichen Niederlausitz“ wjelgin pozitiwny wótgłos žněłej.