Z Pólskeje/Polen. „Ewangelske Serby – historija a źinsajšny cas“ – to jo była tematika multimedialneje prezentacije, z kótarejuž jo dr. Jerzy Krzyszpień z Krakowa gano wustupił w ewangelskej wósaźe w Bielsku, w źělu pólskego města Bielsko-Biała. Mjazy pśisłucharjami z tamneje wósady jo był teke etnologa z Pólskeje akademije wědomnosćow we Waršawje.

Referent jo ako prědne pódał nejwažnjejše informacije wó Serbach a wó Łužycy. Pśi tom jo wuzwignuł, kak wažna jo była reformacija za wuwiśe serbskego pismojstwa a k tomu jo pśedstajił nejstarše a teke nejnowše serbske cerkwinske a nabóžne knigły. Pomjenił jo teke žednych serbskich procowarjow – mjazy drugim Handrija Zejlerja a Bogumiła Šwjelu -, kótarež su pokazali, kaki wjeliki wuznam jo měło ewangelske serbstwo za wuwiśe serbskeje narodneje kultury.