Něnt jo jasne, kak buźo se šulstwo w měsće Chóśebuz w lětach 2023 do 2027 wuwiś. Abo lěpjej gronjone, kak by se mógało wuwiś! Wšykno to jo wobšyrnje a šyroko wopisane w planje, ako su cłonki měsćańskego parlamenta slědny tyźeń wobzamknuli. Do togo su se we frakcijach a wuběrkach a dalšnych gremijach dłujki cas z tym zaběrali.
W toś tom planje su wšykne šule w Měsće wopisane a analyzěrowane a co dej se w pśiducych pěś lětach w nich staś, mjazy drugim to, kake twaŕske źěła deje se w nich pśewjasć.
W jadnom dypku se wobjadna teke serbske šulstwo. Tak dej se normalna serbska wucba dalej wjasć w sedym zakładnych šulach. Witaj-wucbu změju mimo Dolnoserbskego gymnaziuma dalej na zakładnej šuli „Lutki“ w Žylowje. Tam pak su notne wobšyrne twaŕske źěła, teke w horśe, aby dostali wuknice a wukniki lěpše móžnosći za nawuknjenje serbskeje rěcy. Teke to stoj w toś tej šulskej koncepciji.