Z Grodka/Spremberg. Filmarje Sophie Riedelojc a Šyškojc bratša Erik a Clemens kśě w pśichoźe pód nowo załožonym labelom „Lusatia Film“ z Łužyce, we Łužycy a wósebnje za łužyski region filmy producěrowaś. To su wóni stwórtk, 23. februara, na gromadnem medijowem snědanju w Sprjewinem kinje w Grodku pśipowěźeli. Pśi prědnej produkciji grajo město Grodk tu głownu rolu. Erik Šyško jo krotko wopisał wobpśimjeśa komedije „Ein Feuerwerk für die Kleinstadt“: „Wulicuju tšojeńka wó žywjenju a lubosći w městašku, na pśikład wó pubertěrowanych młodostnych, wó młodych dorosćonych pśi rozsuźenju mjazy wóstaśim abo spušćanim, wó zmakanju měsćańskich wótpósłańcow a pótajmnosći na złośonej swajźbje.“