Z Korutańskeje/Koroška/Kärnten. 5. měrca budu w awstriskem zwězkowem kraju Korutańska, źož jo se Serbske mustwo na Europeaźe 3. městno dobyło, nowy krajny zejm wuzwóliś. Korutańska jo teke domownja awtochtoneje słowjańskeje mjeńšynje Słowjeńcow. We wobłuku wuzwólowańskego wójowanja jo młoźinska organizacija pšawicarskeje partaje FPÖ (Freiheitliche Partei Österreichs) na instagram napominała „krajnego hauptmana“ Peter Kaisera wót SPÖ (Sozialdemokratische Partei Österreichs) wótwóliś, aby „Słowjenizaciju“ Korutańskeje zaźaržali.
To njejo jano konflikt w stronje FPÖ a w Awstriskej zawinowało, pak teke w Słowjeńskej. Tamnjejšy ministerium wenkownego jo w werbalnej nośe na awstriskego kněžaŕstwa pódšmarnuł, až take napominanje pómjeńšujo pšawa słowjeńskeje mjeńšyny a direktnje zranijo awstriske statne dogrono. W 7. artiklu su tam pšawa chorwatskeje a słowjeńskeje mjeńšyny napisane.