Z Města/Cottbus. Do Domowinskeje kupki Chóśebuz słuša wjele cłonkow, ako su južo wjele lět w Domowinje. Mjazy tymi něntejšnymi 74 cłonkami jo ga wokoło 30, ako su južo wušej 70 lět stare, to groni, až běchu južo w casu DDR Domowinje pśistupili. Jano 9 cłonkow su młodše ako 50 lět!
Rowno toś ta situacija jo grała slědny tyźeń na głownej zgromaźinje měsćańskeje kupki wažnu rolu. Pśedsedaŕka Sabina Siegowa, ako južo 34 lět dłujko tu wjeliku kupku nawjedujo, jo we swójej rozpšawje wó źěle w lěśe 2022 južo na to pokazała, a w diskusiji su se pśibytne cłonki k tomu wugónili. Naraźiło jo se, za tych cłonkow, za kótarychž jo śěžko, se wusokego starstwa a chórosćow dla wobźěliś na zarědowanjach a žywjenju kupki, pśewjasć wósebne zgromaźiny. To by mógało byś take zmakanje seniorow, a južo w maju co pśedsedaŕstwo take prědny raz na take pśe-pšosyś. Co to tak organizěrowaś, až buźo transport do Serbskego domu garantěrowany.