Z Dešna/Dissen. Łoni w nowembrje jo se južo wótměł kurs pleśenja kórbikow. To jo był zachopjeńkaŕski kurs, w kótaremž su nejpjerwjej ptaškowu wjažku wuplatli. Na prědnem kóńcu tyźenja w februarje toś togo lěta su startowali zwětšego te same wobźělniki kurs za pókšacowanych pla Petera Lehmanna. Źěłaŕnicku jo organizěrowała Šula za dolnoserbsku rěc a kulturu Chóśebuz, wóna jo se wótměła w rumnosćach Domowniskego muzeja Dešno.
Jaden z wobźělnikow kursow jo był Erik Pankin, wón jo pedagogiski sobuźěłaśeŕ za wobceŕk pód gołym njebjom Stary lud w Dešnje. Wón wužywa workshop ako dalejkubłanje za swójo źěło w słowjańskem srjejźowěku, aby se hyšći wěcej z materialom wjerby rozestajał. Zaměr kursowego dnja jo był, až kuždy z kórbom domoj pójźo. W běgu šesć góźinow jo kuždy z wobźělnikow swój indiwidualny kórb wugótował. Kuždy jo měł jadnake wuměnjenja a weto su kórby wšake byli. Pla jadnych kórbik jo był šyršy, druge su wuzwólili za swój kórbik jadno abo dwě wušy.