Z Města/Cottbus. Nowy chóśebuski wušy šołta Tobias Schick (SPD) jo se wjele prědk wezeł. To, až buźo dolnołužyska metropola hyšći rědnjejša a atraktiwnjejša. Jaden z prědnych a nejwažnjejšych nadawkow wiźi wón we tom, wótpóraś skóńcnje tu „brachu“, tu zapusćonu rolu mjazy Blechenoweju kupnicu a Barlinskeju drogu. Něźi 6.000 kwadratnych mejtari jo wóna wjelika.

Něga w casu DDR jo to był rědny centrum města, wót architektow a twaŕskich źěłaśerjow wugótowany zajmny architektoniski ansambel z gósćeńcami, z rumnosćami za reje a bowling, z młogimi lodami a z dłujkim móstom za pěškarjow. Pó lěśe 1990 njejo se take „socialistiske“ wšakim wěcej spódobało. Wšykno jo se wótryło. Su tam kśěli załožyś wjelike kupnice. Tencasna „Treuhand“ jo ten ceły terrain 2006 pśedała na towaristwo „EKZ Stadtpromenade Cottbus GmbH“. To groni, až su pśišli te cełe grunty do priwatnych rukow. Twarili su pón něntejšny „Blechenowy karej“, ten jo 26. septembra 2008 wótwórił prědny raz swóje źurja za kupowarje.