Som Lucie Loichenojc a cynim wót 6. do 24. februara 2023 w redakciji Nowego Casnika praktikum. Som 14 lět stara a se naroźiła w Drjejcach, źož hyšći bydlim. Som wótrosła w serbskej familiji, togodla znajom serbsku kulturu a serbsku rěc wót togo casa, ako som zachopiła mysliś. W zakładnej šuli som zachopiła serbsku rěc aktiwnje wuknuś. Něnto chójźim do Dolnoserbskego gymnaziuma w Chóśebuzu do źewjetego lětnika. Mójej nejlubšej pśedmjata stej serbšćina a informatika. Serbsku rěc lubujom, dokulaž powědam ju wót 12 lět a lubujom serbsku kulturu. Informatiku mam rada, dokulaž to jo wjelgin wažne za pśichod. W šuli som sobu załožyła „Šulski Casnik“, kótaryž wen pśiźo dwa raza w mjasecu. Lubujom casnikaŕske źěło. Se teke myslim, až jo dobra ideja serbsku rěc do šulskego dnja zapśimjeś, a to w formje šulskego casnika. Nowy Casnik cytam južo wót někotarych lět a mam historiju Nowego Casnika za zajmnu. Togodla som pisała w slědnych mjasecach fachowe źěło wó Nowem Casniku. We njom som pśeslěźiła wudaśa Serbskego Casnika wót lět 1921 do 1927 a te som pśirownała z Nowym Casnikom lětnikowu 2022 do 2023.