Z Barlinja/Berlin. W lěśe 1926 běchu w Barlinju prědny raz wugótowali tu něnto južo nejwětšu bursku wustajeńcu na swěśe, ako jo znata ako Zeleny tyźeń. Žedne lěta jo wóna wójny dla wupadnuła, tak až jo była ta lětosna akle ta 87.

Wót 20. do 29. januara jo wokoło 300.000 luźi woglědało do tych 20 wjelikich a mjeńšych halow wósrjejź Barlinja. Mjazy nimi su byli wěsće tež młoge woglědarje ze serbskich jsow w Dolnej Łužycy. Kuždy źeń ga su z Chóśebuza tamkor jěli žedne wósebne buse. Luźe su byli narske, dwa raza ga běšo Zeleny tyźeń korony dla wupadnuł.

Wokoło 1.400 firmow, ako maju něco cyniś z rolnikaŕstwom, z produkciju zežywadłow (Lebensmittel) a teke z gólnistwom a ze struskami, jo tam pokazało swóje nejnowše produkty a swójo źěło a za to wabiło. Wóni su pśišli ze 60 krajow cełego swěta. Njejsu pak jano pokazali swóje produkty a wóry, ale su teke pokazali, kak se wšuźi procuju naźěłaś wjelgin strowu carobu a kak pśi burskem źěle teke lěpjej šćitaju naturu a žarje energiju.