Ze Smogorjowa/Schmogrow. Młodostne to wuměju, serbski zapust ze žywjenim wudopołniś. Wó tom su se domorodne a wjele gósći slědny kóńc tyźenja pśeznaniś mógli. Južo stwórtk su se zmakali młodostne k spiwanju w młoźinskem klubje. How su teke lětnu licbu na klambawje, kótaraž nawjedujo zapustowy pśeśěg w Smogorjowje, aktualizěrowali. Pětk su młodostne pótom w roznogaśonej smogorjojskej wutwari camprowali. Lodowe temperatury njejsu mógli dobru zmysl pśi tom wugóniś. Cele nawopaki – z głosnymi spiwami, pśewóźowane wót picańskich měs-ćańskich gercow, su woglědali něźi 50 dwórow. Mytowało jo młodostnych kóńc tyźenja to nejlěpše zapustowe wjedro. Sobotu su we jsy camprowali. Hyšći raz pśisamem 150 dwórow su woglědali a wejsnu drogu z barwojtymi kostimami napołnili. Wjelike jo było wjasele, až jo se mógał pó dwójolětnej korona-pśestawce stary nałog zasej tak pśewjasć, ako Smogorjowarje jen znaju. Toś wjele wjasela jo se jim to camprowanje pó jsy napórało.