Z Drjenowa/Drehnow. Žedno městno njejo było na žurli gósćeńca „Jagdhof“ w Drjenowje slědny pětk wěcej liche: wěcej ako 120 Drjenowarjow njejo kśěło woklapnicu pó dwójolětnej pśestawce skomuźiś. Nejmłodšy wobźělnik jo był Friedrich Drechsel. Dwa mjaseca stare góletko jo drěmało w płachśicce pla mamy Marje: „Mój syn jo se na 11.11. w slědnem lěśe naroźił, ale jo wó tśi minuty pśepózdźe pśišeł, jogo cas naroźenja jo zeger 11.14“, jo pśispomnjeła młoda mama zmyrkotajucy. Mały Friedrich jo źěl statistiki šołty Ericha Lehmanna: „Drjenow ma 508 wobydlarjow, jadnasćo su pšec a su 19 pśiśěgnuli. Dogromady jo było w slědnyma lětoma sedym naroźenjow, wěcej źowćow ako gólcow.“