Ze Slěpego/Schleife. Serbski folklorny ansambl Slěpe z.t. swěśi lětosa swójo 50lětne wobstaśe. Na to pokazujo pśedsedaŕka Stefanie Bierholdtojc w aktualnem amtskem łopjenje zastojnskego zjadnośeństwa Slěpe. Towaristwo co jubilej dostojnje swěśiś. Togodla pśigótujo tšojenje dłujkodobnje. Wšake akcije su za nazymje planowane. Mjaz drugim co ansambel chroniku wó towaristwowych stawiznach pśedstajiś.

„Pšosymy za ten projekt wšych něgajšnych a aktiwnych cłonkow wó sobuźěło“, wujasnjujo pśedsedaŕka. „Wjaselimy se na spomnjeśa wót probow abo wustupow, luštne anekdoty a wobraze, aby chronika wót cłonkow za cłonki nastała. Se wě mógu wšykne, kenž se z towaristwom zwězane cuju, swóje tšojeńka na nas pósłaś. „Kontakt jo móžny z e-mailku pód adresu abo z postom na Serbski folklorny ansambel Slěpe, Měrowa dróha 65, 02959 Slěpe.

8. septembra 2023 wótmějo se zeger 19:00 swěźeńske zarědowanje ku góźbje jubileja w žurli Serbskego kulturnego centruma Slěpe. Źeń pózdźej se zmakaju aktiwne a něgajšne cłonki ansambla. Dalšne informacije slěduju w pśiducych tyźenjach.