Z Gór/Guhrow. Wjas Góry ma 516 wobydlarjow a dwě góletce stej se we tom lěśe naroźiłej. Z 17 wěrowanjow ma górski Milanowy dwór nejžwoblubowańše městno za swajźby w bórkojskem amśe. Šołtowka Kerstin Jaserowa jo na lětosnej woklapnicy rozpšawiła wó nowych dušach na športnišću, pilnych wobydlarjach, kótarež su swóje grunty do rěcha pórali, wó angažemenśe, zjawne grunty cyste źaržaś, wó intensiwnem źěle k wugótowanjeju pomnika wójnikow we srjejźi jsy. Wó detailach wobradowanjow dla pomnika a šćitanego duba jo gmejnski zastupnik Ulrich Blaschke informěrował. Pśi tom jo něgajšna šołtowka Erna Koppermannowa na to mysliła, až jo był pomnik južo w 70-ych lětach SED-wušynje špjeńc we wócyma. Šołtowka Kerstin Jaserowa jo se wšyknym za sobustatkowanje źěkowała a jo pśibytnych napominała wětšy zajm za pósejźenja gmejnskego zastupnistwa pokazaś. Wóna jo apelěrowała: „Ze mnu móžośo pśecej powědaś. Mam kuždy tśeśi stwórtk wót zeger 17:00 rěcnu góźinu. Anonymne wuzjawjenja nam njepomagaju.