Z Kózlego/Casel. Spódobnje a ze serbskimi barwami su se rědowu halu wognjoweje wobory w Kózlem wupyšnili, ako jo wejsna pśirada tam slědnu sobotu na woklapnicu pšosyła. Wejsna zastojaŕka Angela Krohnowa jo jadnab 40 wobydlarjow pó dwěma lětoma pawze wuwitała a jo tu w měrcu 2022 wuzwólonu nowu pśiradu pśedstajiła, ku kótarejž zastupny zastojaŕ Stefan Rescher a cłonk Thomas Noack słušatej. Krotko jo wóna wó źěle pśirady w zachadnem lěśe rozpšawiła a Kózlanarjam źěkowała za pomocniwe zběranje za Ukrainu. Kózle ma 19 nowych wobydlarjow, wósym wósobow jo pšec śěgnuło a jadna paršona jo wumrěła. Což nastupa pśedewześa wejsneje pśirady za 2022, jo Angela Krohnowa facit śěgnuła, až dla śěžkosći z běrokratiju njejo wšo se tak derje raźiło. Z rozwězanim tych problemow co pśirada ale w nowem lěśe se dalej zaběraś. Gromadu źěło z towaristwami jo pak pśecej dobre.