Z Strjažowa/Striesow. Šołta Fred Kaiser a jogo zastupnik Matthias Zempel stej strjažojskich wobydlarjow serbski wuwitałej na lětosnej woklapnicy, kótaraž jo se slědny pětk we wejsnem gósćeńcu „Zum Dorfkrug“ wótměła. W prezidiumje su hyšći gmejnske zastupniki Dešna-Strjažowa sejźeli, Christoph Neumann wót boka amtskego zastojnstwa a Roswitha Schierowa (CDU), wótpósłana krajnego sejma. Na zachopjeńku jo 90 pśibytnych w měrnej minuśe spomnjeło na w zachadnych lětach zamrětych. Nejžpjerwjej jo dało licby a fakty: Nagromadu bydle 984 wósobow w gmejnje Dešno-Strjažow, wót nich 360 w Strjažowje. Nejstarša wobydlaŕka jo 97-lětna Grete Rybakowa a nejstaršy jo Adolf Pěśik (Pöschick) z 92 lětami. „Njejo dało žedne naroźenje w Strjažowje, to groni, wót togo boka njejo korona how pomagała, ako pla nas w Dešnje“, jo gronił Fred Kaiser ze smjejkotanim. Jadna familija jo do Strjažowa pśiśěgnuła, dogromady dajo 26 źěłaŕstwo wugbajucych. Pótom jo Fred Kaiser wó planowanem solarnem parku mjazy Dešnom a Strjažowom informěrował. Plany za to laže w amśe Bórkowy a na internetowem boce amta.