Z Barlinja/Berlin. Lětosny Mjazynarodny zeleny tyźeń – głowne wjelewiki za zežywjenje, rolnikaŕstwo a zagrodnistwo – buźo wót 20. do 29. januara 2023 a jo za woglědarjow wótworjony wót zeger 10:00 do 18:00. Mjazy tymi wěcej ako 1.400 narodnymi a mjazynarodnymi wustajarjami su znate firmy z Łužyce teke pódla. Kraj Bramborska se prezentěrujo w hali 21a a Sakska w hali 21b. Dnja 23. januara wótwórijo ministerprezident Dietmar Woidke „krajny źeń“ za Bramborsku. We wobłuku prezentacije Błośańskego towaristwa (Spreewaldvereien e.V.) wustupijo njeźelu, 22. januara Duo Le Dazzo z jazzom, latinom a serbskimi popowymi spiwami na Bramborskem jawišću. 27. a 28. januara pśedstajijo górnoserbska rejowańska kupka wěcej razow wob źeń serbske drastwy a reje na Sakskem jawišću w hali 20. Wušej togo buźo pisana wjelerakosć jěźow a piśow z tu- a wukraja, z cełego swěta.