Z Města/Cottbus. Stwórtk wjacor jo Chóśebuz dožywił ceło newšedny ruš, a to wšo na serbski! Serbski ludowy ansambel (SLA) jo na Komornem jawišću pśedstajił wjacorny program za dorosćonych „Ptaškowa swajźba“ z wobsajźenim chora, orchestra a baleta.

Aktualita pó 152 lětach njejo se zgubiła

Originalna komiska opera Korle Awgusta Kocora a Handrija Zejlerja „Jakub a Kata“ jo nastała hyšći w lěśe 1871, k prědnemu razoju su ju publikomoju pśedstajili w Budyšynje w lěśe 1966.

Głownej charaktera Jakub a Kata Wólšowinka stej manźelskej, kenž dožywijotej krizu we srjejźi žywjenja. Pó zwadach a rozestajanjach se rozsuźujotej, až buźotej se źěliś. Kuždy wót njeju pyta za sebje nic jano nowu drogu, ale teke nowe mě. Wónej se pśeměnijotej tak, až njejo wěcej k póznaśeju. Telik se pśeměnijotej, až pśi nowem zmakanjeju pó pěś lětach matej jaden jadnogo za cele drugich luźi. Pón wšykno se mjazy nima wótnowotki zachopijo!

Stara opera na modernu wašnju