Z Myšyna/Müschen. Zachadnu njeźelu jo śěgnuło něźi 60 gósći do nowego domu wejsneje gromady abo „Domu Myšynarjow“ ako gronje. Gmejnski prědkstojaŕ Jens Quitz a jogo zastupnica Christiane Pfaffowa stej z Michaelom Apelom organizowałej zmakanje „Wjasele do rejki – Eintanzen zur Fastnacht“.
„Ako smy załožyli nowy dom gmejnskeje zgromadnosći smy musali zwěsćiś, což by kśěli how gótowaś. Tak smy se wopšašali wobydlarjow, co sebje žyce, a mjazy drugim jo był zajm za tradicionalne serbske reje wjeliki. Smy znali program Michaela Apela wót drugich zarědowanjow a smy se wjaselili, až smy mógali jogo dobyś za to źinsajšne zmakanje“, jo groniła Christiane Pfaffowa.