Z Budyšyna/Bautzen. Wobšyrnje a dokradnje spomnjejo Serbski muzeum w Budyšynje lětosa na wuznamnego modernego serbskego mólarja Jana Buka pśi góźbje jogo 100. narodnego dnja. K tomu jo wudała muzeumowa wjednica Christina Boguszowa gromaźe z dalšnymi wužytnymi fachowcami katalog ze zajmnymi nastawkami w serbskej, pólskej a nimskej rěcy. Reprodukcije a zapiski twóŕbow, wobšyrnje wopisana biografija z fotami z priwatnego žywjenja a nic naslědku zapisom twóŕbow zjawnych zběrkow wudopołniju wobraz a žywjeńsku bogatosć wuměłca. Wustajeńca a katalog njamóžotej pak wóne wobšyrne a wjelebocne wuměłstwo togo jubilara – skice, mólby, akwarele, wobraze, wuměłstwo w zjawnych rumnosćach ako barwjonych woknach, mozaikach, graffitijach na domach – Jana Buka kompletnje pśedstajiś.