Z Rubyna/Ruben. Wjednica Domowinskeje kupki w Rubynje, Anett Zyšcyna, jo na prědne pósejźenje w lěśe 2023 do tamnjejšeje stareje šule pšosył. Jadnab 30 cłonkow jo pśišło, aby zachadne lěto wugódnośiło. Zapust jo w lěśe 2022 – tak ako w drugich jsach – korony dla do wódy padnuł. Město togo su Rubynarje w serbskich drastwach pó jsy špacěrowali. Gromadu z dobrowólneju wognjoweju woboru a młoźinu jo Domowinska kupka wšake zarědowanja na nogi stajiła, mjazy drugim su majski bom stajali, źiśecy a pózdźej wejsny swěźeń organizěrowali a k prědnemu adwentoju najsy wjeliki gódowny bom ze swětkami wupyšnili. Rubynarje su jadnogłosnje wjerašk zachadnego lěta wucynili: A to jo był wuspěšne wobźělenje na wjelikem pśeśěgu w ramiku Domowniskego a drastwinego swěźenja we Wjerbnje. Wóni su wjelerakosć teje małeje wjascycki z rědnym wobrazom wótmólowali, su sport, wognjowu woboru, wejsne žywjenje a wšake warianty serbskeje drastwy pśiglědarjam pśedstajili. Nejžwažnjejšy dypk dnjownego pórěda jo pak był pśigótowanje zapusta, kótaryž dej se z pśeśěgom pó jsy 29. januara swěśiś.