Z Bórkow/Burg. Slědnu sobotu su Bórkojske gromadu pśišli na swóju woklapnicu, kótaraž jo prědny raz była w tamnej młodowni. W mjenju gmejnskich zastupowarjow jo šołta Hans-Jürgen Dreger (bźez partaje) cesnoamtski angažement Siegmunda Lehmanna wót „Zjadnośeństwa serbskich błośańskich rybakarjow“ cesćił za zdźaržanje serbskeje tradicije. Jomu su pśepódali cesnu urkundu teje wjelikeje jsy. Wušej togo jo se spomnjeło, až Zjadnośeństwo serbskich błośańskich rybakarjow mjaztym eksistěrujo 70 lět. Na samsku wašnju su cesćili Lydiju Budišinowu za lětnu organizaciju beneficnych koncertow w Bórkojskej cerkwi. Tśeśi cesćony jo był Ernst Bleske, kenž jo se w Bórkowach kradu angažěrował we wognjowej woborje a w turistiskem towaristwje. Šołta Dreger jo informěrował wót nowych awtow za Kupaŕsku wognjowu woboru a jo wulicował, až budu zachopiś twariś halu za wěcej zaměrow (Mehrzweckhalle) w Bórkowach: „Myšynarje, kenž ga pśisłušaju bórkojskej gmejnje, maju wót 2022 rědny nowy dom wejsnego zgromaźeństwa. Tam smy teke swěśili gódownicku za tych staršych, za seniorow.