Z Bórkow/Burg. Raz wob lěto zmakajo se bórkojska młoźina k wjelikej lětnej głownej zgromaźinje. Ta se wótměwa w nowembrje. Kužde lěto se wuzwólijo młoźinske pśedsedaŕstwo, abo to stare wordujo wobkšuśone. Aktualnje ma bórkojska młoźina 56 cłonkow, jadnasćo nowych su na lětnej głownej zgromaźinje pśiwzeli.
Annemarie Schrötterojc jo wót lěta 2021 šefowka młoźiny, wóna ma pódpěru wót Julije Klincyc, jeje zastupnice. Za kasu jo Sebastian Ahr zagronity, za ten amt pśigótujo wón Doriana Urbana. Na lětnej głownej zgromaźinje jo powědała Annemarie Schrötterojc wó zachadnem lěśe a jo dała póglěd za lěto 2023.
Pó oficielnem źělu jo była rejowańska góźina, aby se južo za zapust pśigótowali. Młodostne su zwucowali walcyk, polku, rajnlendaŕ, luxemburgsku reju, Anemarju a diskofoks. Lětosa buźotej skóro dwa jubileja: 130. zapust 21. januara a 130. kokot 30. julija.