Z Barlinja/Berlin. Srjejź nowembera jo krajna synoda krajneje cerkwje EKBO gromadu stupiła na nazymske zejźenje. Chtož jo cytał pśedłogi k tomu, njejo wótcakał žednych wjeraškow. Wótběg jo se zdał ako pśecej. Som se womóliła. Ako cerkwine wjednistwo smy stajili póžedanje wó pśeměnjenje cerkwinskeje kazni za naš intranet. Nałožowańska winowatosć a pśedwuśěgnjenje musytej se skóńcyś, dla njespokojnosći a wobśěžkanjow. Pón su w plenumje móžnosći rozwězanja a modele financěrowanja diskutěrowali. Wšym jo bywało jasnje, až trjebamy tu zgromadnu computerowu setku za cełu EKBO, za dobru a wěstu komunikaciju a lěpše pósrědnjenje informacijow za kuždego. Musymy portal „wir.gemeinsam.ekbo.de“ solidarnje zgromadnje financěrowaś. Toś ja se ako cłonka cerkwinego wjednistwa wjaselim, až su póžedanje wótpokazali a synoda jo pśidatnje pominała załoženje pśirady, źož budu zastupjone wužywarje LKI, aby nawjedowali pólěpšenje kwality. To jo dobra ideja.