Z Budyšyna/Bautzen. Dawid Statnik, pśedsedaŕ Domowiny, jo cłonk w CDU a cłonk wokrejsnego sejma Wokrejsa Budyšyna. Tam su měli 12. decembera wótgłosowanje, na póžedanje AfD. Wó póžedanju jo šło wó pšašanje, lěc wokrejs co dalej sobu financěrowaś integraciske kurse a druge wěcy za migranty, kótarež njesměju w Nimskej wóstaś. Póžedanjeju su pśigłosowali tek CDU-niki we tom sejmje. Jaden CDU-nik jo głosył pśeśiwo póžedanjeju, druge su se zdźaržali głosa. Ku tym, kótarež su pśigłosowali póžedanjeju AfD, słuša Dawid Statnik.

Až CDU-niki su pśigłosowali póžedanjeju AfD, jo wubuźiło mócnu kritiku. Nejpjerwjej su to zasuźowali cłonki drugich partajow. Kritika jo teke była wót boka CDU-frakcijowu w Sakskojskem sejmje a we Zwězkowem sejmje. Powědaŕka CDU-centrale w Barlinju jo groniła, až CDU jo jasnje wobzamknuła, až niźi nigdy njebuźo sobu źěłaś z AfD. Wót serbskego boka jo teke zazněła mócna kritika. W socialnych medijach a hynźi jo se Statnik toś nejpjerwjej wupšawjał dla teje wěcy. Pótom, ako ta kritika jo pśemócna bywała, jo se wódawał na instagramje a w medijach.