Z Města/Cottbus. W Chóśebuzu njezabyty mólaŕ romantiki a genialny „mólaŕ swětła“ Carl Eduard Ferdinand Heinrich Blechen (1798–1840) jo źe nejwuznamnjejšy mólaŕ serbskego luda. Naroźił se jo wón dnja 29. julija 1798 w Chóśebuzu we Łukojskej gasy (Luckische Gasse, źinsa Barlinska droga). Jogo nan Anton Adrian Blechen (1767–1821) jo był z pódpołudnjoweje Nimskeje pśidrogowany dankowy zastojnik (Steuerbeamter). Zmanźelił jo wón se w lěśe 1792 ze Serbowku Janu Kitu Hapacojc (Johanna Christiana Happatz) z Liškowa (Groß Lieskow, dla brunice znicona wjas). Gólcyk pśebywašo cesto pla wujka, bratša maśerje, kótaryž jo statkował ako serbski faraŕ w bliskej jsy Módłej (Madlow), a pla starego nana, kótaryž jo był w rodnej jsy maśerje, w Liškowje, šlodaŕ. Tegdy su byli jsy wokoło města ako teke ceły chóśebuski wokrejs hyšći pśisamem dopołnje serbskorěcne. Samo tśi lěta pó smjerśi Blechena ga jo była ludnosć wokrejsa Chóśebuz-kraj pó amtskem licenju hyšći 71 procentow serbskorěcna. Tak jo kradu wěrjepódobnje, až jo Karlo Blechen w źiśecych lětach serbsku rěc wjelgin cesto słyšał a teke rozměł.