Z Města/Cottbus. Pó tom až bu Serbski muzej na Młyńskej droze w Chóśebuzu 1994 załožony a wótwórjony, su mógali za te prědne 20 lět śěgnuś wjelgin wuspěšnu bilancu. Su licyli w tom casu jadnab 100.000 gósći, a su mógali mimo stawneje wustajeńce wokoło 100 wósebnych wustajeńcow z młogimi temami wugótowaś. Załožyli su 2014 teke spěchowańske towaristwo, ako muzej na wšaki part wjelgin derje pódpěrujo, a pśewjadli su prědne „Serbske blida“. Pón pak su pśišli za Serbski muzej śěžčejše lěta. Wót 2016 do 2020 bu wón docełego wobnowjony a teke stawna wustajeńca jo dostała kradu nowe a moderne woblico, pśi comž grajo we njej něnto wšykno kołowokoło serbskeje rěcy wjelgin wažnu rolu. A korona wót lěta 2020 jo muzeumoju bejnu škódu napórała.