Z Baršća/Forst. To wjasele jo było wjelgin wjelike, ned na zachopjeńku posejźenja wokrejsnego sejma Sprjewja-Nysa (SPN) slědny źeń w nowembrje. A to nic jano pla cłonkow togo wažnego gremiuma, ale wósebnje pla młodeje serbskeje žeńskeje! Na zachopjeńku lěta 2021 ga běšo toś ten wokrejsny sejm wobzamknuł, až wokrejs SPN płaśi ze swójogo etata pśidatny stipendium za tu abo togo, ako studěrujo na serbsku ceptaŕku abo serbskego ceptarja. Na ten part comy spěchowaś a pódpěrowaś serbske ceptaŕstwo a z tym dolnoserbsku rěc, su tegdy gronili.

Ako docełego prědna jo dostała taku cesć a wusoke pśipóznaśe Paula Hirtojc z Rogozna/Roggosen. Zastupny krajny raźc Olaf Lalk a pśedsedaŕ wokrejsnego sejma dr. Torsten Schüler stej jej wótpowědne pismo a k tomu dar a struski pśepódałej a jej wutšobnje gratulěrowałej. A pśibytne wótpósłańce ze wšych frakcijow su k tomu z cełeje wutšoby pśiklaskali.