Z Janšojc/Jänschwalde. Jadnab 65 cłonkow janšojskeje Domowinskeje kupki jo se slědny pětk na pśepšosenju pśedsedaŕki Rosemarie Tšukoweje zmakało. Za gódownu atmosferu stej na zachopjeńku zgromaźiny starałej Janšojski žeńskecy chor a nowo załožony Janšojski muskecy chor „Frohsinn“. Nawjedował jo jej Gerald Šejn. Chora stej spiwałej serbske a nimske gódowne spiwy. Na kóńcu wustupa su wšykne – chora a cłonki – spiwali „O ty wjasoły“. Teksty su na blidach pśigótowane byli.