Z Podstupima/Potsdam. Dnjowny pórěd pósejźenja Serbskeje rady wałtoru, 29. nowembra, jo wjelgin wobšyrny był. Jadnab 26 wósobow jo se wobźěliło na slědnem zmakanju rady lětosa, a to jano online pśed monitorami. Katrin Šwjelina jo rozpšawiła wó šestem forumje europskich mjeńšynowych regionow w Irskem měsće Galway/Gaillimh. Dalšna tema jo była kubłanje, wósebnje což nastupa napšawy k pólěpšenjeju kwality bramborskich šulow a staw digitalizacije w šulskem wobłoku. Za to su se zastupniki ministaŕstwo za kubłanje, młoźinu a sport (MBJS) wobźělili. Pšašali su se mjazy drugim, kak daloko digitalizacija w šulach jo, lěc jo serbska rěc pśi digitalizaciji zapśimjeta a kake materialije za serbsku wucbu su zapołožyli na šulskej cloud. Šulska cloud jo digitalne wucbne a wuknjece pórucenje, kenž jo za wuknikow a ceptarjow pśistupne, wšojadno lěc wót doma abo w šuli. MBJS k wěsći dajo, až se akle pśepytujo, lěc jo móžno serbske wucbne materialije pśiwześ, ale zasadnje jo to móžno.