Z Gołkojc/Kolkwitz. Až se Serbski wuběrk pśi wokrejsnem sejmje Sprewja-Nysa njezmaka pśi swójich pósejźenjach jano we Wokrejsnem domje w Baršću, ale cesto teke w nimsko-serbskich gmejnach, amtach a městach, njejo nic nowego. Tenraz – 23. nowembra- su se cłonki togo gremija a gósći zmakali w Gołkojcach w tamnem gmejnskem domje. Su tam kśěli zgóniś, kak w tej wjelikej gmejnje ze 17 jsami tuchylu wuglědajo ze serbskim žywjenim. To su słyšali wót šołty Karsten Schreiber. Maju tam dwě Domowinskej kupce w Gołbinje a w Cazowje a Tradiciske towaristwo w Popojcach, ako se mócnje stara za woplěwanje serbskich tradicijow a serbskeje drastwy. Zapust swěśe we wšych jsach, kokot łapiju w Popojcach, a ze jatšownym spiwanim su teke južo zachopili.