Z redakcije/Redaktion. Ja som nowy redaktor Nowego Casnika, mě se groni Olko abo Oleg (we wupokazu) Derepasko. Som 37 lět stary a bydlim w Měsće. Som južo wam tšochu znaty, cu něnto zawóstajiś formalnu wašnju žywjenjoběga a wulicowaś wó sebje tak, ako sam sebje wiźim z wažnikami, kótarež sam mam za wažne, zajmne a aktualne.
Mógu sebje pomjeniś ako staśan swěta a language-freak, wuknu źe swóju źewjetu rěc a w cełem žywjenju som se zaběrał ze skóro dwaźasća rěcami. Wótere wót nich pak som wšakorakich zawinow dla dawno wóstajił, z drugimi som žywy kuždy źeń dalej.