Z Bórkow/Burg. Wót 24. do 28. oktobra jo Serbski ludowy ansambel (SLA) instrumentalne ferijowe lěgwo organizěrował. 17 źiśi a młodostnych jo se ze wšakimi klasiskimi a modernymi instrumentami wobźěliło. Wuslědki zajmnego a muzikaliskego tyźenja su slědny pětk wjacor w koncerśe prezentěrowali. W awli bórkojskeje zakładneje a wušeje šule „Mina Witkojc“ su sobuźěłaśerje SLA k tomu jawišćo natwarili. Na lěwem boce su stojali instrumenty beatoweje kapały – dujaŕske, e-gitara, e-bass , bijadło a keyboard, na pšawem boce instrumenty klasiskego orchestera - cello, fidle, akordeon, flejta a klawěr. Samo intendant SLA Tamaš Kreibich-Nawka jo z młodymi gercami zwucował a pśi wustupje sobu grał. Młode talenty su wjelgin pisany program pśedstajili, raz instrumentalne solo z klawěrowym pśewóźowanim, drugi raz rockowy aranžement z dujaŕskimi elementami, tśeśi raz měrne klasiske zuki.