Z Chóśebuza/Cottbus. Až se naša dolnoserbska swěźeńska drastwa zgubijo, ten tšach njewobstoj. Tšochu hynac to wuglědajo ze źěłoweju serbskeju drastwu, ako jo cesćej wiźeś pśi wšakich góźbach. K njej pópšawem słuša módra šorca, ako jo wupyšnjona ze wšakimi mustrami, na wobyma bokoma. W originalu su wóni zgótowane ze sukna z módrośišćom (Blaudruck). A we tom štycy ten problem! We Łužycy mamy tuchylu pópšawem jano hyšći jadnu rucnikaŕsku firmu, ako take gótujo, ga w Pulsnitz. Wóna jo, tak se groni, nejstarša manufaktura za módrośišć w cełej Nimskej. W Dolnej Łužycy jo to młoda wuměłcowka a šlodaŕka Sarah Gwiszczowa w Lubnjowje, ako jo se južo w lěśe 2011 z wjelikim wuspěchom dała do wótžywjenja (Wiederbelebung) módrośišća, a to z młogimi artikelami za moderne woblacenje wósebnje za młode žeńske abo za darjenje. W Chóśebuzu jo to Evelin Rühtz-Müllerowa, ako se južo wjele lět z teju tekstilneju techniku zaběrajo.