Z Pódstupima/Potsdam. Serbska rada (RASW) jo se pśedslědnu wałtoru zasej zmakała w Bramborskem sejmje. Tematiske śěžyšćo na dnjownem pórěźe jo było tema kubłanje. Pśi tej góźbje su powědali wó Zakładnej šuli „Krabat“ w Janšojcach, źož maju serbšćinu a wucbu we serbskej rěcy. Wósebnje jo se pśi tej góźbje wuzwignuło brach personala a teke felujuce městno. Picańska amtska direktorka Elvira Hölznerowa jo na to spominała, až na bliskem lětanišću w Drjejcach buźo drje wót pśiducego lěta „Green Areal Lausitz“. Tam buźo wjele luźi źěłaś, a te luźe změju źe źiśi a pótrjebaju dosć městnow w šuli. Pódla jo była Katrin Dannenbergowa (Lěwica), wóna jo powědaŕka kubłańskeje politiki we frakciji Lěwice w bramborskem sejmje. Wóna jo wuzwignuła, až w najsańskich stronach, we jsach, teke šulske městna su wažne, nic jano źěłowe městna. Wšak dej Łužyca byś atraktiwna za familije – a za to su bydlenja a socialne institucije wažne. Pśi tej góźbje jo Elvira Hölznerowa groniła, až su w Janšojcach-pódzajtšu wjele bydlenjow wótpórali, dokulaž su dłujko prozne byli.