Ako jo prjatkowanje mimo było, su byli wšake aktiwity a graśa.Z Dešna/Dissen. Tšochu zaźiwane su cłonki wósady Žylow–Dešno –Strjažow byli, ako su glědali na pśipowěźenje faraŕki Köhleroweje, kenž jo pśepšosyła na tu prědnu namšu we dešańskich nadrěkach. Njeźelu su ewangelske kśesćijany z teje wósady se zmakali na parkowanišću blisko Cartoweje góry, źož jo se zachopiła namša, pón su wše sportowali. „Wesrjejź corona-casa su luźe jano doma sejźeli na kawčy, wóni njejsu mógli wence gromaźe sportowaś a se wulicowaś. Na to comy reagěrowaś a se tšochu pógibaś“, tak Katharina Köhlerowa, ako jo wužywała ideju kupki wósady „Nam­šu wobchowaś, wugótowaś a pśeměniś – Gottesdienst bewahren, gestalten und verändern“. We prědnem źěłu namš, na tamnem piknikowem městku, jo góletko, wósym mjasecow stary Lukas, wordowało dupjone.