Běły Gózd/Schönwalde. Južo pór razow su pokazali musical za źiśi „Kara w kraju lutkow“ na jawišću. Něnto jo se to graśe prědny raz nazwucowało w šuli, a to w Běłem Gózdźe (w Dolnych Błotach). Pśisamem wše tych 147 wuknicow a wuknikow tamneje zakładneje šule su sobustatkowali. Chtož njejo rejował, spiwał abo grał, jo měł swój nadawk w techniskem wobłuku, jo pśedawał zastupnicki abo něco drugego. Dwa raza su kusk pokazali na jawišću, a to pětk 24. julija. Wuwitałej stej Aliena Huber a Jana Herzberg ze solu a klěbom. Wónej chójźitej do 3. rědownje. Teke na generalnu probu źeń do togo su gósći pśišli.