Z Budyšyna/Bautzen. Jo wałtora, krotko do sedymich wjacor. W „Burskej śpě“ w Konjecach (Cunnewitz) zmakaju se cłonki muskecego chora „Delany“ ako kuždy tyźeń na probu. Chylku pózdźej pśiźo teke Matej Kowaŕ. Wón jo ceptaŕ za serbsku rěc a muziku na budyšyńskem Serbskem gymnaziumje a wuměłski wjednik togo chora wót lěta 2019. Wón wšyknych wita ze serbskim katolskim póstrowom, sednjo se za klawěry a grajo melodiju za zaspiwanje. Njetrajo dłujko, a spiwarje su pśigótowane a spiwaju ludowu ariju „Naš njeboh dźěd“. Ceła śpa wibrěrujo. Młody dirigent chwali tych dwaźasćoch muskich: „To sćo cysto spiwali!“ Tam a zas wulicujo Kowaŕ žorśik, wšak dej to zmakanje wótměnjate byś.